Нывонды куывд Уастырджийы бӕрӕгбон
- Стыр Хуыцауы хорзæх нæ уæд!
- Оммен, Хуыцау!
- Кæддæриддæр нын æххуысгæнæг куыд уа, уыцы амонд нæ уæд!
— Бæрæгбон у, æмæ ныл афæдзæй-афæдзмæ дзæбæхæй куыд æмбæлæм, Уыцы амонд нæ уæд!
—Уастырджийы бонтæ сты, æмæ Уастырджи хуыздæр ахъаз кæмæн ракодта, Мах дæр уый æмбал куыд уæм, ахæм амонд нæ уæд!
— Бинонтæ стæм, æмæ фидардæр бинонтæ чи фæци. Стыр Бæрзонд Хуыцау хуыздæр хæрзтæ кæмæн ракодта, Мах дæр уыдон æмбал куыд уæм, ахæм хорзæх нæ уæд!
— Уæдæ нын сыхбæстæ ис æмæ уыцы сыхбæстима кæрæдзийы æмбаргæйæ, уарзонæй куыд цæрæм, ахæм амонд нæ уæд!
— Нæ хистæртæ амондджынæй, хъæлдзæгæй сæ кæстæрты циндзинадæй æфсæст куыд уой!
— Бæрæгбон у, æмæ хистæртæн Хуыцау ахæм ахъаз бакæнæд, æмæ сæ кæстæртæ фылдæрæй-фылдæр, амондджынæй-амондджындæр куыд кæной!
— Уæдæ афæдзæй-афæдзмæ кусæрттæ куыд кæнæм, æмæ сæ Стыр Хуыцау йæхимæ адджынæн кæмæн айста, мах дæр уый æмбал цы фæуæм, Уастырджи нын кæддæриддæр æххуысгæнæг куыд уа, Ахæм хорзæх нæ уæд!
— Хохæй быдырмæ цы дзуæрттæ, цы дауджытæ ис, уыдонмæ бирæ адæм фæкуывтой, нæ фыдæлтæн бирæ хорздзинад лæвæрдтой, æмæ сæ хорзæхæй мах дæр хайджын куыд уæм, ахæм арфæ нæ уæд!
— Уæдæ, бæркадджын куыд уæм æмæ Дуне сабыр куыд уа, зæххы къорийыл адæм сæ кæрæдзийы куыд уарзой, уыцы амонд дæр нæ уæд!
— Гъеныр, уазæгæй кæнæ хæстæгæй чи 'рбамбæлди, Уыдон дæр амондджын куыд уой, Уыцы хорзæх сæ уæд!
— Оммен чи кодта, уыдоны цæрæнбон бирæ уæд!
— Оммен, Хуыцау!
Нашли ошибку?Не забудьте сообщить. oscalendar@odva.pro